ನನ್ನ ಕಣ್ಣ ಕುಡಿಗೆ..

ನವ ಸೃಷ್ಟಿಗೆ ಬಿಸುಪೇರಿದ ಮನ,
ನೀ ಈ ಜೀವದಲಿ ಉದ್ಭವಿಸಿದ ಕ್ಷಣ
ಮತ್ತೇಕೆ ಹೀಗೆನ್ನ ಕಾಡಬೇಕು?

ಒಡಲೊಳಗಿನ ಆ ಕಂಪನ,
ಮಡಿಲೊಳಗಿನ ಮೃದು ಸಿಂಚನ,
ಸೆರಗೊಳಗೆ ಸೆರೆಯಾದ ಕಂದನ
ಆ ದಿನಗಳೇಕೆ ಮನದೊಳಗೆ ತೆರೆಯಬೇಕು?

ಕೈ ಹಿಡಿದ, ಜೊತೆ ನಡೆದ
ಪುಟ್ಟ ಪಾದಗಳ ಸೊಟ್ಟ ಹೆಜ್ಜೆ ಗುರುತುಗಳ
ನೆನಪಾಗಿ ಇಂದೇಕೆ ನಾ ಕನಲಬೇಕು?

ನೀ ಬೆಳೆಯಬೇಕು, ಮುನ್ನೆಡೆಯಬೇಕು
ಕಿರುಬೆರಳಿನಾಸರೆಯ ಮೀರಿ.
ನಿನ್ನ ಕನಸುಗಳ, ನನ್ನ ಬಯಕೆಗಳ
ಸಮ್ಮಿಳಿತದ ಸಾರವ ಹೀರಿ.

ಸಾಧನೆಯ ದಾರಿಯಲಿ ಮುಂದೆ ಸಾಗು,
ಆಸರೆಯು ಬೇಕಿರಲು ನನ್ನೆಡೆಗೆ ಬಾಗು.
ನಿನ್ನೊಳಗೆ ನಾನು - ನನ್ನೊಳಗೆ ನೀನು,
ನಮಗೇಕೆ ಇನ್ನು ಬೇರಾದೇವೆಂಬ ಭಯದ ಹಂಗು?!
ನಮ್ಮೆದೆಯ ಮಡತೆಗಳಲಿ ಅನುರಣಿಸಲಿ ಸದಾ ನಗು.